[تقرير سياحي] تجربتي في الغردقة - الموسوعة السياحية

السلام عليكم يا فتوكات

الحمد لله سافرت الغردقة لمده 48 ساعة و رجعت و عايزة اقولكم ان فكره ايجار شقه فكره فاشلة و سيئة اولا كلمت شركة عامله اعلانات كتير علي النت باسعار كويسة و مكان جيد و كان سعر الليله حوالي 150 جنية لشقه غرفتين للاسره و كانت مواصفات الشقه تري البحر و مفروشه بكل شي ماعدا غساله الملابس و بها تكييف و مراوح و يوجد اسانسير عشان معانا مريض بالقلب واكدت علية اثناء الحجز كل شئ و ان تكون نظيفة و كذلك ميعاد وصولنا ...

عندما وصلنا وجدنا الشقه غير نظيفة و لا تري البحر اطلاقا و تبعد عن البحر مسافة 5 دقائق مشي و الاسانسير عطلان و لما بلغناه باختلاف المواصفات ورانا 4 شقق ليسوا افضل حالا . و كمان اكتشفنا ان التليفزيون بايظ و الثلاجة بابها مش بيقفل و غرفه بها تكييف و الاخري مروحه و الحمام غرقان مية و طبعا اتزحلقنا اكتر من مره و لما بلغناه جه ادانا ممسحة و خلاص .. طبعا حاجة تقرف. بالاضافة قال ان في نت اثناء الحجز و لما روحنا قال عايزين نت اشتوا السلك طويل عشان يوصل للدور التالت.

اضطررنا في اليوم التالي الي تغيير الشقه و بدأنا بالبحث عن اقرب فندق للمكان:
- فندق مينا مارك 4 نجوم ليس به اماكن شاغره
- فندق وايت الباتروس 3 نجوم مكانة ممتاز و اسعاره جيده شامله الافطار و به مصعد و الغرف مكيفة و نظيفة الي حد ما و لكن اثاثه قديم بعض الشئ و لا يوجد خدمة غرف يعني تشتري حاجاتك و تحطها في الثلاجة و تعمل لنفسك الشاي او اي شئ تريده بالغرفة .المنظر من الدور السادس بالمطعم اثناء الافطار حلو جداااا. و تحت الفندق كافيه شيك و لطيف لو اردت تشرب شئ او تأكل حاجه خفيفة طبعا بالاسعار السياحية و ساعات باليل في مغني و فرقة و شيشة للمدخنين و فية واي فاي.
الفندق في موقع ممتاز في طريق الشيراتون ملئ بالمطاعم مثل جاد و ماكدونالدز و كنتاكي و مؤمن و بيتزا كنج و سوبر ماركت ابو عشره و بازارات و فنادق و منتجعات اخري علي طول الطريق ناحية البحر و مكن للسحب النقدي من البنوك.

بالنسبة للمواصلات لم استطع تجربه المواصلات العامة لضيق الوقت لكن بالنسبة للتاكسي المشوار القصير 5 جنية و الطويل 10 جنية و لو معاكي شنط كتير لا يزيد ابدا بأي حال من الاحوال عن 20 جنيه بالكتييييررررر.

في اماكن كتير حلوه للخروج بس ملحقتش اروحها لضيق الوقت مثل الممشي السياحي و سنزو مول و المارينا .... بس روحت كافيه حلو جنب فلفله اسمة جرانادا ممتاز يطل علي البحر من هضبة و الاسعار نسبيا معقوله هي برضه اسعار سياحية و الخدمة ممتازه و كذلك النظافه.

بالمناسبة لو حتزوروا حد هناك خدوا معاكم الهدية من محافظتكم عشان مش سهل تلفوا علي هدية هناك خالص عشان نشتري هدية وصلنا لميدان الدهار مول اسمة دهب و حولة بعض المحلات الجيده تبيع ادوات منزليه و مفيش محلات حلواني شرقي او غربي خالص و لو عرفتوا قولولي ؟؟؟

بس عموما يا جماعة هي كانت رحلة لطيفة و ان شاء الله نكررها

يا ريت يا جماعة اكون فدتكم و ياريت تفيدوني بخبرتكم بخصوص اماكن الخروج و المطاعم و الفنادق و تجاربكم عموما في الغردقة .... و لو عايزين تسألوا علي حاجة ابعتولي و افيدكم من تجربتي